Tíðarfar ársins 2017

Yfirlit

19.1.2018

Árið 2017 var hlýtt og tíð hagstæð. Febrúar, maí, september og október voru sérlega hlýir. Úrkoma var þó óvenjumikil um landið austanvert. Tjón hlaust af flóðum og skriðuföllum á Suðaustur- og Austurlandi í lok september sem komu í kjölfar mikillar úrkomu og hlýinda til fjalla á svæðinu. Óvenjumikil snjódýpt mældist í Reykjavík í febrúar og mars eftir að 51 cm jafnfallinn snjór féll aðfaranótt sunnudagsins 26. febrúar. Alhvítir dagar á Akureyri voru óvenjufáir og hafa ekki verið eins fáir síðan mælingar hófust. Árið endaði í svalara lagi, nóvember var kaldur og síðustu dagar desembermánaðar voru þeir köldustu á árinu. Vindar voru með hægara móti um land allt.

Hiti

Meðalhiti í Reykjavík var 5,5 stig og er það 1,2 stigum ofan meðallags áranna 1961 til 1990 en í meðallagi síðustu tíu ára. Í Stykkishólmi var ársmeðalhitinn 4,9 stig, 1,4 stigum yfir meðallagi áranna 1961 til 1990. Á Akureyri var meðalhitinn 4,9 stig sem er 1,7 stigum yfir meðallagi áranna 1961 til 1990 og það 5. hlýjasta frá upphafi mælinga. Á Stórhöfða í Vestmannaeyjum var meðalhiti ársins 5,7 stig, 0,8 stigum ofan meðallags áranna 1961 til 1990. Á Egilsstöðum var meðalhitinn 4,8 stig og er þetta næsthlýjasta árið þar frá upphafi mælinga, hlýrra var 2014. Á landsvísu var hitinn 1,4 stigum ofan meðallagsins 1961 til 1990, en 0,3 stigum ofan meðallags síðustu tíu ára. Meðalvik og vik á fleiri stöðvum má sjá í töflu.
Meðalhiti og vik ársins 2017 á nokkrum stöðvum

stöð	hiti °C	vik 1961-1990	röð	af	vik 2007-2016
Reykjavík	5,5	1,2	16	147	0,0
Hvanneyri	4,6	#	8	20	0,0
Bláfeldur	5,3	#	7	20	0,2
Stykkishólmur	4,9	1,4	11	172	0,1
Bolungarvík	4,4	1,5	10	120	0,3
Litla-Ávík	4,3	#	4 til 5	22	0,3
Bergstaðir	4,2	#	5	39	0,4
Grímsey	4,4	2,0	4	144	0,5
Akureyri	4,9	1,7	5	136	0,6
Grímsstaðir	2,3	2,0	5	111	0,7
Miðfjarðarnes	3,9	#	4	18	0,6
Skjaldþingsstaðir	4,6	#	4	23	0,6
Egilsstaðir	4,8	1,9	2	63	0,8
Dalatangi	5,3	1,8	3	80	0,6
Teigarhorn	5,3	1,6	2	145	0,6
Höfn í Hornaf.	5,8	#			0,4
Fagurhólsmýri	5,7	1,1	10 til 12	105	0,2
Vatnsskarðshólar	6,1	1,1	8	40	0,2
Stórhöfði	5,7	0,8	23	141	-0,1
Árnes	4,6	1,1	21 til 22	138	0,0
Hjarðarland	4,4	#	11	28	0,0
Hveravellir	0,5	1,6	7	53	0,2
Eyrarbakki	5,2	1,2	20	125	0,0
Keflavíkurflugvöllur	5,4	1,1	13 til 14	65	-0,1

Ársmeðalhitinn var hæstur í Surtsey, 6,6 stig, en næsthæstur á Garðskagavita, 6,5 stig. Lægsti ársmeðalhitinn var á Brúarjökli -1,5 stig, og lægstur í byggð í Möðrudal, 2,0 stig.
Árið var hlýtt á landinu öllu og á langflestum stöðum var hlýrra en að meðaltali síðustu tíu ár. Að tiltölu var hlýjast á Norðausturlandi. Jákvæð hitavik miðað við síðustu tíu ár voru mest á Eyjabökkum, +1,0 stig og á Kárahnjúkum, +0,9 stig. Að tiltölu var kaldast á Suður- og Suðvesturlandi. Neikvæð hitavik miðað við síðustu tíu ár voru mest á Laufbala, -0,3 stig og á Botnsheiði, -0,1 stig.


Í Reykjavík var hiti yfir meðallagi í öllum mánuðum nema þeim tveim síðustu. Á Akureyri var hiti undir meðallagi í júní, ágúst, nóvember og rétt undir meðallagi í desember. Mjög hlýtt var í febrúar, maí, september og október og þá sérstaklega á Akureyri.
Hæsti hiti ársins á landinu mældist 27,7 stig á Végeirsstöðum í Fnjóskadal þann 25. júlí, en mesta frostið mældist -29,0 stig í Svartárkoti þann 29. desember. Hæsti hitinn á mannaðri stöð mældist 24,3 stig á Ásgarði í Dölum þann 26. júlí, en mest frost, -24,3 stig á Grímsstöðum á Fjöllum þann 29. desember.
Hæsti hiti í Reykjavík mældist 22,5 stig þann 27. júlí en mest 24,1 stig á Akureyri þann 22. júlí. Lægsti hiti í Reykjavík mældist -8,5 stig þann 11. desember, en á Akureyri mældist lægsti hitinn  -17,9 stig þann 29. desember.
Tvö ný mánaðarhámarksmet voru sett á árinu. Nýtt febrúarmet var sett þann 12. febrúar þegar hitinn mældist 19,1 stig á Eyjabökkum, sem er það hæsta sem mælst hefur í febrúar á landinu til þessa. Og nýtt septembermet var sett þegar hitinn mældist 26,4 stig á Egilsstaðaflugvelli þann 1. september, eldra met var 26,0 stig á Dalatanga þann 12. september 1949.

Úrkoma

Úrkoma var yfir meðaltali áranna 1971 til 2000 á flestum stöðum landsins og í kringum meðallag sé miðað við síðustu tíu ára. Mest var úrkoman á Austurlandi. Óvenjulega mikil úrkoma var á Austur- og Suðausturlandi í lok september sem olli miklum vatnavöxtum í ám, flóðum og skriðuföllum í þeim landshluta. 

stöð	ársúr	hlut f7100 %	Hlutf 0716 %	mest d.	úrkd	Úrkd>=1	alhv	alautt
Reykjavík	900,4	109,5	100,3	28,6	241	157	59	285
Stykkishólmur	678,6	95,7	87,5	37,8	209	133	29	306
Brjánslækur	1087,2	92,8	99,0	48,9	171	142	50	250
Lambavatn	997,0	102,6	108,9	24,2	234	152	#	#
Hólar í Dýrafirði	943,9	75,8	81,5	37,3	244	140	94	205
Litla-Ávík	959,4		107,5	36,7	262	170	75	223
Bergstaðir	499,4	107,4	110,2	20,9	195	102	86	236
Litla-Hlíð	474,5	124,7	124,4	29,2	179	100	94	223
Sauðanesviti	884,3	102,6	96,3	39,7	232	146	98	196
Akureyri	594,9	114,7	99,9	23,7	207	120	50	278
Lerkihlíð	885,3	113,2	107,2	47,5	223	143	121	178
Mýri	543,6	124,3	106,3	38,2	189	119	110	192
Grímsstaðir	374,4	106,6	89,1	11,2	203	98	118	192
Dalatangi	2169,5	144,7	129,1	92,0	287	172	66	268
Höfn í Hornafirði	1727,5	128,7	117,0	61,2	231	169	#	#
Vatnsskarðshólar	1922,8	118,1	111,2	50,3	253	197	33	293
Hjarðarland	1162,0	86,7	87,1	40,2	210	160	45	262
Írafoss	2112,7	116,5	107,6	96,0	178	169	47	236
Keflavíkurflugvöllur	1083,0	97,1	101,9	37,3	250	176	24	295

Ársúrkoma (mm) í fyrsta dálki. (2) Hlutfall miðað við 1971-2000 (samanburður næst við fleiri stöðvar þetta tímabil heldur en 1961-1990). (3) Hlutfall miðað við árin 2007 til 2016 (nýliðinn áratug). (4) Mesta sólarhringsúrkoma (mm). (5) Fjöldi úrkomudaga. (6) Fjöldi daga með úrkomu 1,0 mm eða meira. (7) Fjöldi alhvítra daga. (8) Fjöldi alauðra daga. 
Úrkoma í Reykjavík mældist 900,4 mm, 10 prósent ofan meðallags áranna 1971 til 2000, en í meðallagi þegar miðað er við síðustu tíu ár. Á Akureyri mældist úrkoman 594,9 mm, 15 prósent ofan meðallags 1971 til 2000, og í meðallagi síðustu tíu ára. Á Dalatanga mældist úrkoman 2169,5 mm, 45 prósent umfram meðallag áranna 1971 til 2000 og 29 prósent ofan meðallag síðustu tíu ára. Þetta er næstmesta úrkoma sem mælst hefur á Dalatanga frá upphafi mælinga 1938. Árið 1950 mældist meira.

Úrkoma í Reykjavík var langt umfram meðallag í febrúar, apríl og maí. Úrkoma var undir meðallagi yfir sumarmánuðina jún til ágúst og október var óvenju þurr í Reykjavík. Á Akureyri var úrkoma mikil í febrúar, september og nóvember og sérlega mikil í maí miðað við meðaltal maímánaðar. Úrkomulítið var á Akureyri í mars og í júlí.
Dagar þegar úrkoma mældist 1 mm eða meiri í Reykjavík voru 157, 9 fleiri en að meðaltali 1961 til 1990. Á Akureyri voru slíkir dagar 120, 17 fleiri en í meðalári. Mest mældist sólarhrings úrkoman í Reykjavík 28,6 mm, 11. júní, en mest 23,7 mm á Akureyri þann 12. október.
Mesta sólarhrings úrkoma ársins á mannaðri stöð mældist á Skjaldþingsstöðum þann 24. júní, 187,9 mm. Aldrei áður hefur mælst eins mikil sólarhringsúrkoma í júní og er þetta því nýtt mánaðarmet. Nýtt mánaðarmet var einnig sett í maí þegar sólarhringsúrkoman mældist 159,6 mm á Neskaupstað þann 13. maí sem er mesta sólarhringsúrkoman sem mælst hefur á landinu í maímánuði til þessa. 

Snjór

Alhvítir dagar í Reykjavík voru 59, 1 fleiri en meðaltal áranna 1971 til 2000. Alhvítir dagar voru vel yfir meðallagi í nóvember. Þann 26. febrúar féll 51 cm jafnfallinn snjór í Reykjavík og er það mesta snjódýpt sem mælst hefur í Reykavík í febrúar. Og í raun næstmesta snjódýpt sem mælst hefur í Reykjavík, en mest mældist hún þann 18. janúar 1937, 55 cm. Þann 1. mars voru enn 36 cm af þeim mikla snjó á jörðu og hefur snjódýpt í Reykjavík aldrei mælst meiri í mars.
Veturinn 2016 til 2017 var mjög snjóléttur á Akureyri. Alhvítir dagar ársins 2017 á Akureyri voru óvenjufáir, aðeins 50 og hafa þeir ekki verið eins fáir síðan snjóhulumælingar hófust þar 1924. Meðaltalið 1971 til 2000 er 102 alhvítir dagar og er þetta því tæpur helmingur af því sem vanalegt er.
Mesta snjódýpt á árinu mældist 120 cm á Lambavatni þann 26. febrúar. 

Myndin sýnir vik fjölda alhvítra daga frá meðallagi í Reykjavík og á Akureyri. Alhvítu dagarnir voru færri en að meðallagi á Akureyri alla vetrarmánuðina og voru þeir sérlega fáir fyrstu fjóra mánuði ársins. Í Reykjavík voru alhvítir dagar vel yfir meðallagi í nóvember en nálægt meðaltali aðra mánuði ársins. 

Sólskinsstundir

Sólskinsstundir í Reykjavík mældust 1334,5, 66 fleiri en í meðalári 1961 til 1990, en 91 stund færri en að meðallagi síðustu tíu ár. Sólarminna var á Akureyri, þar mældust sólskinsstundirnar 932,8 eða 112 færri en að meðaltali 1961 til 1990 og 137 færri en að meðallagi síðustu tíu ára. 
Í Reykjavík var mjög sólríkt í ágúst, en sólskinsstundafjöldi var nálægt meðallagi aðra mánuði ársins. Mjög sólarlítið var í apríl og júní á Akureyri, sólríkt í ágúst en sólskinsstundafjöldi nálægt meðallagi aðra mánuði ársins. 

Loftþrýstingur

Meðalloftþrýstingur í Reykjavík var 1005,2 hPa og er það 0,7 hPa undir meðallagi áranna 1961 til 1990.

Þrýstingur vék ekki langt frá meðallagi í einstökum mánuðum ársins 2017. Jákvæð mánaðarvik voru mest í janúar, nóvember og desember. Neikvæð mánaðarvik voru mest í febrúar, júní, júlí og september.
Hæsti þrýstingur ársins mældist 1041,0 hPa á Reykjavíkurflugvelli þann 1. janúar en lægstur á Gufuskálum þann 24. febrúar 951,7 hPa.

Vindhraði og vindáttir

Vindhraði á landsvísu var undir meðallagi á árinu. 
Árið í heild var hægviðrasamt. Vindhraði á árinu var undir meðallagi áranna 1960 til 1991 fyrstu þrjá mánuði ársins. Vindhraði var yfir meðallagi frá apríl til júlí, mest í maímánuði. Seinni partur ársins var hægviðrasamur, þá sérstaklega október.


Allar vindathuganir á skeytastöðvum eru þáttaðar í austur- og norðurstefnur, mánaðarmeðaltöl reiknuð og borin saman við meðalvindvigra áranna 1961 til 1990. Austlægar og norðlægar áttir fá jákvæð gildi, vestlægar og suðlægar neikvæð. Sunnanáttir (appelsínugular súlur) voru óvenju tíðar í janúar, febrúar og september, en norðlægar í maí, júní, ágúst og svo aftur í lok árs. Vestanáttir (bláar súlur) voru ríkjandi í janúar og svo síðustu þrjá mánuði ársins, en austlægar áttir voru algengari í febrúar, maí, júní og júlí.

Lauslegt yfirlit um einstaka mánuði

Janúar
Tíð var lengst af hagstæð og samgöngur greiðar. Fremur hlýtt var í veðri og með snjóléttara móti á láglendi. Úrkoma var ekki fjarri meðallagi. Minna var um illviðri en venjulegt er á þessum tíma árs.
Febrúar
Febrúarmánuður var hlýr og vætusamur. Einkum var hlýtt á norðan- og austanverðu landinu og vætusamt um sunnan- og vestanvert landið. Úrkoma var flesta daga á sunnan- og vestanverðu landinu og snjólétt um allt land þar til kyngdi niður snjó við Faxaflóa aðfaranótt þ. 26. og vöknuðu íbúar höfuðborgarinnar við 51 cm jafnfallinn snjó þann dag. Er það næstmesta snjódýpt sem mælst hefur í Reykjavík til þessa en mest mældist hún hinn 18. janúar 1937, 55 cm.
Mars
Tíð var lengst af hagstæð og samgöngur greiðar. Hiti var nærri meðallagi, en úrkoma heldur minni en venja er í flestum landshlutum nema sums staðar austanlands. Vindar voru talsvert hægari en oftast er í marsmánuði.
Apríl
Aprílmánuður var úrkomusamur á landinu, sérstaklega þó vestan- og norðvestanlands þar sem úrkoma var meiri en um áratugaskeið. Hiti var aftur á móti nærri meðallagi. Veður var lengst af meinlítið og tíð fremur hagstæð þó gróðri færi lítt fram.
Maí
Maí var óvenju hlýr og hiti vel yfir meðallagi. Sérlega hlýtt var fyrstu vikuna og aftur í kringum þ. 21. Víða var úrkoma í meira lagi. Í Reykjavík mældust 84,4 mm sem er um 92% umfram meðallag 1961-1990. Á Akureyri mældist úrkoman 62,2 mm sem er mesta úrkoma sem mælst hefur í maímánuði frá upphafi mælinga, eldra met var 59,2 mm árið 1929. Gróður tók vel við sér.
Júní
Tíðarfar var nokkuð hagstætt í júní. Hiti var þó í svalara lagi miðað við meðaltal síðustu 10 ára en yfir meðallagi á flestum stöðum sé miðað við tímabilið 1960-1990. Úrkoma var vel yfir meðallagi á Austurlandi. Sólskinsstundir voru mjög fáar norðanlands og hafa sólskinsstundir ekki verið færri í júní á Akureyri síðan 1972, þá voru þær jafnfáar og nú en enn færri 1968.
Júlí
Tíðarfar var almennt hagstætt í júlí. Hlýtt var um meginhluta landsins, helst að svalt þætti suðvestanlands fram eftir mánuði. Úrkoma var víðast hvar minni en í meðalári.
Ágúst
Hiti var í svalara lagi á landinu í ágúst. Veður var þó almennt gott. Hægviðrasamt var um land allt og úrkoma var minni en í meðallagi að Norðurlandi undanskildu. Sólskinsstundir voru vel yfir meðallagi suðvestanlands
September
September var hlýr og úrkomusamur mánuður, óvenju hlýtt og blautt var á austanverðu landinu. Mjög hlýir dagar voru í byrjun mánaðarins og svo aftur um hann miðjan, þá sérstaklega norðaustan- og austanlands þar sem hiti fór víða vel yfir 20 gráður og allmörg hitamet voru slegin. Sunnan- og austanáttir voru ríkjandi. Mikil úrkoma í lok mánaðar og hlýindi til fjalla ollu miklum vatnavöxtum á Suðaustur- og Austurlandi. Mikið tjón hlaust af flóðum og skriðuföllum á þessum svæðum.
Október
Tíðarfar var hagstætt í október. Óvenju hlýtt var og hiti vel yfir meðallagi í öllum landshlutum. Fremur þurrt var á vestanverðu landinu en úrkomumeira á Austfjörðum og Suðausturlandi. Vindur var hægur.
Nóvember
Nóvember var kaldur og sker sig nokkuð úr öðrum mánuðum ársins, sem flestir hafa verið hlýir. Norðanhvassviðri gekk yfir landið dagana 21. til 24. nóvember sem olli þó nokkru fannfergi norðan og austanlands. Færð spilltist víða.
Desember
Desember þótti svalur en veður voru hæg. Síðustu dagar ársins voru sérlega kaldir á landinu, þá sérstaklega norðaustanlands. Úrkoma og vindhraði voru undir meðallagi.

Skjöl fyrir árið

Ársmeðalhiti sjálfvirkra stöðva 2017 (textaskjal)

Tíðarfar ársins 2016 - Veður.is

Tíðarfar ársins 2016

Yfirlit

20.1.2017

Árið 2016 var sérlega hlýtt hér á landi. Við Breiðafjörð og á Vestfjörðum var það hlýjasta ár frá því að mælingar hófust og í hópi þeirra hlýjustu í öðrum landshlutum. Hiti fyrstu tvo mánuðina var þó nærri meðallagi en haustið sérlega hlýtt. Vindar voru með hægara móti. Fremur þurrt var um tíma, frá því síðla vetrar og fram á sumar, en haustið óvenjuúrkomusamt, sérstaklega um landið sunnanvert.

Hiti

Meðalhiti í Reykjavík var 6,0 stig og er það 1,7 stigi ofan meðallags áranna 1961 til 1990. Er þetta 21. árið í röð með hita yfir meðallagi og næsthlýjast þeirra 146 ára sem samfelldar mælingar ná til ásamt 2014. Í Stykkishólmi var ársmeðalhitinn 5,5 stig, 2,0 stigum yfir meðallagi. Þetta er hlýjasta ár frá upphafi mælinga í Stykkishólmi 1846. Á Akureyri var meðalhitinn 4,9 stig, 1,7 stigi ofan meðallags. Þar var nokkru hlýrra árið 2014. Á Stórhöfða í Vestmannaeyjum var meðalhiti ársins 6,0 stig, 1,2 stigum ofan meðallags. Á landsvísu var hitinn 1,7 stigum ofan meðallagsins 1961 til 1990, og en 0,7 stigum ofan meðallags síðustu tíu ára. Meðalhita og vik á fleiri stöðvum má sjá í töflu.

Meðalhiti og vik ársins 2016 á nokkrum stöðvum

stöð	hiti °C	vik 1961-1990	röð	af	vik 2006-2015
Reykjavík	6,0	1,7	2 til 3	146	0,6
Stafholtsey	4,7		1	29	0,7
Bláfeldur	5,8		2	19	0,8
Stykkishólmur	5,5	2,0	1	171	0,8
Bolungarvík	5,0	2,1	1	120	1,0
Litla-Ávík	4,8		1	22	0,9
Bergstaðir	4,5		3	38	0,7
Grímsey	4,8	2,5	2	144	1,1
Akureyri	4,9	1,7	5	135	0,6
Grímsstaðir	2,2	1,9	5	110	0,7
Miðfjarðarnes	4,1		2	18	0,8
Skjaldþingsstaðir	4,7		3	23	0,7
Egilsstaðir	4,7	1,8	2	63	0,8
Dalatangi	5,3	1,8	2	79	0,7
Teigarhorn	5,3	1,6	2	143	0,5
Höfn í Hornaf.	6,0				0,6
Fagurhólsmýri	6,0	1,4	2	104	0,5
Vatnsskarðshólar	6,5	1,4	2	39	0,6
Stórhöfði	6,0	1,2	11	140	0,3
Árnes	5,2	1,6	4	137	0,6
Hjarðarland	3,4		3	27	0,6
Hveravellir	1,0		2	51	0,8
Eyrarbakki	5,7	1,7	2	124	0,7
Keflavíkurflugvöllur	5,9	1,5	3	65	0,5

Ársmeðalhitinn var hæstur á Steinum undir Eyjafjöllum 7,1 stig, en næsthæstur í Surtsey, 7,0 stig.  Lægstur var ársmeðalhitinn á Þverfjalli, -0,1 stig, og lægstur í byggð í Möðrudal 1,8 stig.

Sé miðað við 1961 til 1990 var að tiltölu kaldast á Stórhöfða en hlýjast í Grímsey. Meðaltal síðustu tíu ára er til fyrir mjög margar sjálfvirkar stöðvar og miðað við það tímabil var að tiltölu hlýjast á Þverfjalli, +1,2 stig ofan meðallags og +1,1 ofan þess í Grímsey og í Sandbúðum, en kaldast var að tiltölu á Stórhöfða, +0,3 stigum ofan meðallags síðustu tíu ára og í Vestmannaeyjabæ, +0,4 stigum ofan meðallags.

Í Reykjavík var hiti ofan meðallags í öllum mánuðum nema febrúar, en hiti var neðan meðallags á Akureyri í janúar, febrúar og svo lítillega í júlí. Mjög hlýtt var í mars og júní og síðan voru síðustu þrír mánuðir ársins sérlega hlýir og október sá hlýjasti sem vitað er um víða um land.

Hæsti hiti ársins á landinu mældist á Egilsstöðum 3. júní, 24,9 stig, en mest mældist frostið -25,3 stig í Svartárkoti 30. mars. Hæstur hiti á mannaðri stöð mældist 21,6 stig á Eyrarbakka 27. júlí en mest frost, -22,7 stig, á Grímsstöðum á Fjöllum þann 30. mars.

Hæsti hiti í Reykjavík mældist 21,3 stig þann 28. júlí (reyndar að kvöldi þ.27.), en mest 20,0 stig á mönnuðu stöðinni á Akureyri hinn 23. ágúst. Svo lágt hefur árshámarkið ekki orðið á Akureyri síðan 1993, en þá var það hið sama og nú. Þann 19. júní mældist hitinn 20,5 stig á sjálfvirku stöðinni við Krossanesbrautina á Akureyri. Lægsti hiti í Reykjavík mældist -10,3 stig þann 31. janúar, en á Akureyri var lægsta lágmarkið -15,0 stig þann 25. febrúar. Sama dag mældist hiti -22 stig á Akureyrarflugvelli.

Árið var það hlýjasta frá upphafi mælinga um landið norðvestanvert. Kortið sýnir stöðu ársmeðalhitans meðal hlýjustu ára á fáeinum stöðvum. Stóra feitritaða talan sýnir röðina, rauðar tölur vik frá meðallagi 1961 til 1990 í °C, rauðar tölur í hornklofa sýna hvaða ár er hlýjast á hverri stöð (þar sem 2016 var ekki það hlýjasta), en svartar tölur í hornklofa sýna hversu lengi hefur verið athugað á hverri stöð.

Úrkoma

Úrkoma var ofan meðallags áranna 1971 til 2000 um meginhluta landsins, en mjög nærri meðallagi síðustu tíu ára (sjá annars töflu).

stöð	ársúr	hlut f7100 %	hlutf 0615 %	mest d.	úrkd	úrkd>=1	alhv	alautt
Reykjavík	933,9	113,6	104,5	31,1	227	153	51	286
Korpa	1115,3	112,8	99,4	43,8	229	165	70	260
Stafholtsey	750,7	99,0	87,5	17,7	200	147	43	282
Stykkishólmur	806,2	113,7	103,2	35,6	212	131	48	302
Brjánslækur	1078,4	92,1	96,3	34,0	168	127	61	255
Lambavatn	1068,0	109,9	115,5	53,0	206	149	#	#
Hólar í Dýrafirði	1336,0	107,3	#	53,0	229	152	65	219
Litla-Ávík	943,3	#	105,2	63,0	229	151	81	238
Hraun á Skaga	450,1	87,4	82,8	25,4	173	96	80	242
Bergstaðir	534,9	115,0	116,0	109,1	186	90	80	254
Litla-Hlíð	356,2	93,6	93,0	14,5	170	88	88	248
Skeiðsfoss	953,9	99,8	103,5	37,7	178	114	142	171
Sauðanesviti	844,1	97,9	91,0	51,6	219	129	67	220
Akureyri	629,2	121,4	107,1	32,5	191	109	94	251
Lerkihlíð	658,3	84,2	77,8	30,0	196	110	120	175
Mýri	464,9	106,3	92,0	44,1	157	92	109	203
Reykjahlíð	484,2	107,5	71,6	24,6	176	110	#	#
Grímsstaðir	444,3	126,5	107,1	61,4	194	123	39	267
Dalatangi	1649,0	110,0	98,4	62,3	257	162	57	289
Höfn í Hornafirði	1718,6	128,1	#	77,6	225	166	48	316
Vatnsskarðshólar	1851,3	113,7	107,7	62,3	247	181	48	266
Hjarðarland	1349,8	100,7	99,6	67,3	209	157	59	267
Írafoss	2159,5	119,0	109,1	102,8	168	161	74	242
Keflavíkurflugvöllur	1147,3	102,9	107,2	48,8	243	176	31	297

Ársúrkoma (mm) í fyrsta dálki. (2) Hlutfall miðað við 1971-2000 (samanburður næst við fleiri stöðvar þetta tímabil heldur en 1961-1990). (3) Hlutfall miðað við árin 2006 til 2015 (nýliðinn áratug).(4) Sólarhringshámarksúrkoma (mm). (5) Fjöldi úrkomudaga. (6) Fjöldi daga með úrkomu 1,0 mm eða meira. (7) Fjöldi alhvítra daga. (8) Fjöldi alauðra daga.

Úrkoman í Reykjavík mældist 933,9 mm, 14 prósent ofan meðallags áranna 1971 til 2000, en 5 prósent ofan meðallags síðustu tíu ára. Á Akureyri mældist úrkoman 629,2 mm, 21 prósent ofan meðallags 1971 til 2000, og 7 prósent ofan meðallag síðustu tíu ára. Á Dalatanga mældist úrkoman 1649,0 mm, um 10 prósent umfram meðallag áranna 1971 til 2000.

Í Reykjavík var úrkoma ýmist rétt við meðallag eða undir því fyrstu átta mánuði ársins, en langt umfram meðallag síðustu þrjá mánuðina. Á Akureyri (rauðar súlur) var úrkoma mikil í febrúar, nóvember og desember, en sérlega mikil í september. Október var þar fremur þurr.

Dagar þegar úrkoma mældist 1 mm eða meiri í Reykjavík voru 153, þ.e.a.s. 5 fleiri en að meðaltali 1961 til 1990, og hafa ekki verið færri síðan 2010 (þá aðeins 109). Á Akureyri voru slíkir dagar 109 nú, sex fleiri en í meðalári.

Mesta sólarhringsúrkoma ársins á mannaðri stöð mældist 157,3 mm á Nesjavöllum þann 12. október – að vísu óstaðfest mæling, en daginn eftir mældust þar 149,2 mm. Mest mældist sólarhringsúrkoman í Reykjavík 31,1 mm, 6. október, en mest 32,5 mm á Akureyri þann 25. september.

Snjór

Veturinn 2015 til 2016 var snjóþungur framan af í Reykjavík, snjór var óvenjumikill í desember 2015 og einnig í febrúar 2016, janúar var í ríflegu meðallagi hvað þetta varðar, en mars var aftur á móti mjög snjóéttur. Haustið var svo með snjóléttasta móti. Alhvítir dagar í mánuðunum desember til mars voru 6 fleiri en að meðaltali 1971 til 2000. Alhvítir dagar árið í heild voru 14 færri en í meðalári.

Snjóalög voru einnig undir meðallagi á Akureyri. Alhvítir dagar ársins 2016á Akureyri urðu 94 og er það 24 færri en í meðalári 1971 til 2000, munar þar mest um snjólétta nóvember og desember. Mest snjódýpt á árinu mældist 160 cm við Skeiðsfossvirkjun þann 10. og 11. febrúar.

Myndin sýnir hversu fjöldi alhvítra daga vék frá meðallagi á Reykjavík og Akureyri mánuði ársins. Sumarið er snjólaust að vanda. Alhvítu dagarnir voru mun fleiri en að meðallagi í febrúar á báðum stöðvum, og í mars á Akureyri. Mars var hins vegar snjóléttur í Reykjavík. Síðustu mánuði ársins var snjór mun minni en venja er á stöðvunum báðum.  

Sólskinsstundir

Sólskinsstundir mældust 1302,2 í Reykjavík, 34 fleiri en í meðalári 1961 til 1990, en aftur á móti 142 færri en að meðallagi síðustu tíu ár. Á Akureyri var árið sólríkt, sólskinsstundirnar mældust 1150,0 eða 105 fleiri en að meðaltali 1961 til 1990 og 94 fleiri en að meðaltali síðustu tíu ár. Var þetta næstsólríkasta ár aldarinnar á Akureyri.

Mjög sólríkt var í Reykjavík í apríl og júlí (bláar súlur), en fremur sólarrýrt í maí, júní og október. Sólarlítið var í  júlí á Akureyri (rautt) en annars var sólskinsstundafjöldi þar yfirleitt yfir meðallagi eða nærri því.

Loftþrýstingur

Meðalloftþrýstingur í Reykjavík var 1005,5 hPa og er það 0,4 hPa undir meðallagi áranna 1961 til 1990.

Þrýstingur vék ekki svo mjög frá meðallagi í einstökum mánuðum ársins 2016. Var þó óvenjulágur í september.

Hæsti þrýstingur ársins mældist 1040,1 hPa á Reykjavíkurflugvelli 31. desember en lægstur á Gufuskálum 20. desember, 944,1 hPa.

Vindhraði og vindáttir

Vindhraði var undir meðallagi og stormdagar færri en í meðalári á landsvísu.

Vindhraði var undir meðallagi áranna 1961 til 1990 fyrstu sex mánuði ársins, og einnig í águst og september. Hann var lítillega yfir því í júlí og október og nokkuð yfir í desember. Árið í heild telst hægviðrasamt.

Allar vindathuganir á skeytastöðvum eru þáttaðar í austur- og norðurstefnur, mánaðameðaltöl reiknuð og borin saman við meðalvindvigra áranna 1961 til 1990. Austlægar og norðlægar áttir fá jákvæð gildi, vestlægar og suðlægar neikvæð. Norðlægar áttir (rauðar súlur) voru ríkjandi í febrúar, apríl og júlí, en suðlægar í mars og svo aftur síðustu þrjá mánuði ársins. Vestanáttir voru tíðari en í meðalári í maí, nóvember og desember, en austlægar fyrstu tvo mánuðina og einnig í júlí.

Lauslegt yfirlit um einstaka mánuði

Janúar

Tíð telst fremur hagstæð; hiti var víðast hvar rétt ofan meðallags áranna 1961 til 1990 en neðan meðallags síðustu tíu ára. Kalt var í veðri inn til landsins á landinu norðanverðu. Úrkoma var undir meðallagi um meginhluta landsins, og á fáeinum stöðvum um landið norðvestanvert var þetta þurrasti janúar um langt skeið.

Febrúar

Kalt var í veðri, sérstaklega inn til landsins. Víða var snjóþungt, en vindar voru oftast hægir þannig að samgöngur gengu lengst af greiðlega. Úrkoma var yfir meðallagi um landið norðaustan- og austanvert en nærri meðallagi eða lítillega undir því um landið suðvestan- og vestanvert. Þó almennt væri með hægviðrasamara móti í mánuðinum gerði samt tvö umtalsverð illviðri, af austri þann 4. og 5. og af suðaustri og síðar suðvestri og vestri þann 15. til 16. Í veðrinu þann 15. til 16. féllu ársvindhraðamet á sjálfvirku stöðvunum á Skjaldþingsstöðum (athugað frá 2006), á Bíldudal (athugað frá 1998) og á Gjögurflugvelli (athugað frá 1994). Febrúarvindhraðamet féllu að auki á allmörgum stöðvum í sama veðri, m.a á Möðruvöllum í Hörgárdal þar sem athugað hefur verið í nær 20 ár. Einnig féllu mánaðarmet í veðrinu þann 4. til 5., þar á meðal í Skaftafelli, á Siglunesi og á Gagnheiði, en á báðum fyrrnefndu stöðvunum hefur verið athugað sjálfvirkt síðan 1995, en ríflega ári lengur á Gagnheiði.

Mars

Tíðarfar var hagstætt að mestu; lengst af var hlýtt í veðri – að slepptum fáeinum dögum í upphafi mánaðarins og enda hans. Nokkuð illviðrasamt var í fáeina daga um miðjan mánuð en tjón varð ekki víða. Þó almennt væri með hægviðrasamara móti í mánuðinum gerði mikil illviðri dagana 12. til 14. samfara því að tvær lægðir gengu til norðurs skammt fyrir vestan land. Í fyrri lægðinni var suðvestanáttin hörðust en sunnanátt í þeirri síðari. Tjón varð mest á Vestfjörðum.

Apríl

Tíðarfar var hagstætt að mestu, hiti var vel ofan meðallags 1961 til 1990, en þó var að tiltölu kaldara um landið austanvert heldur en í öðrum landshlutum. Úrkoma var mikil austast á landinu en þurrviðrasamt og sólríkt um landið vestanvert. Snjór var víðast hvar minni en í meðalári nema inn til landsins á Norðausturlandi.

Maí

Tíðarfar telst hagstætt; þurrkur háði þó víða gróðri langt fram eftir mánuði. Í síðustu vikunni rigndi óvenjumikið á Snæfellsnesi og á sunnanverðum Vestfjörðum. Hiti var ofan meðallags 1961 til 1990 en þó var að tiltölu kaldara um landið suðvestanvert heldur en í öðrum landshlutum. Þrátt fyrir þurrviðri var veður heldur þungbúið lengst af um landið sunnan- og vestanvert. Snjóþungt var sums staðar inn til landsins á Norðausturlandi langt fram eftir mánuði en annars var víðast hvar snjólítið eða snjólaust í byggðum. Snjórinn norðaustanlands var að mestu fyrningar vetrarins en þó gerði þar töluverða hríð snemma í mánuðinum sem nægði til að snjódýptarmet maímánaðar féllu bæði á Grímsstöðum á Fjöllum (86 cm) og í Reykjahlíð (62 cm).

Júní

Tíð var hagstæð, þurrkur háði sums staðar gróðri fram eftir mánuði – en þegar upp var staðið varð úrkoma nærri meðallagi. Mjög hlýtt var í mánuðinum um nær allt land, á hálendinu er þetta hlýjasti júní síðan mælingar hófust þar fyrir rúmri hálfri öld og um meginhluta landsins er mánuðurinn í hópi þriggja til sjö hlýjustu júnímánaða frá upphafi mælinga. Sólskinsstundir voru venju fremur fáar suðvestanlands.

Dyrfjöll og Stórurð. Ljósmynd: Oddur Sigurðsson.

Júlí

Tíð var talin sérlega hagstæð um landið sunnan- og vestanvert en nyrðra var hún daufari og jafnvel talin óhagstæð á stöku stað. Mánuðurinn telst þó veðragóður um land allt og lítið var um illviðri. Úrkoma var með allra mesta móti sums staðar austast á landinu en víðast hvar nokkuð eða talsvert undir meðallagi vestanlands. Sólskinsstundir voru vel yfir meðallagi suðvestanlands. Úrkoma var óvenjumikil allra nyrst á Austfjörðum, sums staðar á Héraði og í Vopnafirði; hefur t.d. ekki mælst meiri í júlí á Desjarmýri og á Skjaldþingsstöðum.

Ágúst

Tíð var talin hlý og hagstæð um mikinn hluta landsins og úrkoma var víðast hvar undir meðallagi að magni til. Sólskinsstundir voru í ríflegu meðallagi suðvestanlands. Fyrsta vika mánaðarins var fremur svöl en síðan gerði mjög góðan hlýindakafla sem stóð nærri því til mánaðamóta.

September

Úrkomusamt var víða norðaustan- og austanlands og sömuleiðis norðantil á Vestfjörðum en að öðru leyti var tíð talin hagstæð. Óvenjuhægviðrasamt var lengst af. Nokkrar frostnætur komu inn til landsins en víðast hvar var alveg frostlaust allan mánuðinn og ber óskemmd til mánaðamóta. Uppskera úr görðum var víðast góð. 

Október

Októbermánuður var sérlega hlýr og víða á landinu sá hlýjasti síðan mælingar hófust. Tíð var mjög hagstæð um mestallt land, en rigningar þóttu ganga úr hófi sums staðar á Suður- og Vesturlandi. Á nokkrum stöðvum var þetta úrkomusamasti októbermánuður sem vitað er um. Mánuðurinn var alveg frostlaus víða við strendur landsins og telst það óvenjulegt. Þetta er næsthlýjasti október sem vitað er um í Reykjavík, lítillega hlýrra var 1915, en munurinn í raun ómarktækur. Á Akureyri var meðalhitinn 7,5 stig, 4,5 stigum ofan meðallags 1961 til 1990 og 4,2 stigum ofan meðallags síðustu tíu ára.  Þetta er einnig næsthlýjasti október á Akureyri, heldur hlýrra var í október 1946. Í Stykkishólmi var meðalhitinn 7,9 stig, sá hæsti nokkru sinni í október, mælingar í október ná aftur til ársins 1846. Úrkoman í Reykjavík mældist 206,9 mm, það langmesta sem vitað er um í október og ríflega tvöföld meðalúrkoma, næstmest mældist 1936, 180,8 mm. Úrkoma hefur aðeins þrisvar sinnum mælst meiri í einum mánuði í Reykjavík. Það var í nóvember 1993 (259,7 mm), febrúar 1921 (242,3 mm) og í nóvember 1958 (212,1 mm).

Nóvember

Hlýtt var á landinu í nóvember. Mjög úrkomusamt var sunnanlands og nyrðra var úrkoma einnig ofan meðallags víða. Tíð var talin mjög hagstæð og veðragóð um mikinn hluta landsins, en veður var samt harla þungbúið og drungalegt lengst af.

Desember

Tíð var lengst af hagstæð og samgöngur greiðar nema fáeina daga undir lok mánaðar. Óvenjuhlýtt var í veðri og um austanvert landið var mánuðurinn sums staðar sá hlýjasti frá upphafi mælinga og í hópi þeirra hlýjustu um land allt. Úrkomusamt var og dimmt. Ekki var mikið um illviðri að undanskildum fáeinum hvössum dögum undir lok mánaðarins og urðu þá nokkrar samgöngutruflanir. Þá kólnaði nokkuð og var snjór á jörðu um allt land að kalla yfir jólahátíðina. Þann snjó tók þó fljótt upp aftur.

Skjöl fyrir árið

Ársmeðalhiti sjálfvirkra stöðva 2016 (textaskjal væntanlegt).

Tíðarfar ársins 2016 verður einnig hægt að sækja sem pdf-skjal.

http://www.vedur.is/um-vi/frettir/tidarfar-arsins-2016